Արդեն մի քանի օր է՝ Մոսկվան չի հստակեցնում՝ արդյոք Ռուսաստանի նախագահը մայիսի 15-ին կմեկնի Ստամբուլ՝ ուկրաինացի պաշտոնակցի հետ ուղիղ բանակցելու: Վլադիմիր Պուտինը երկու երկրների միջև ուղիղ բանակցություններ անցկացնելու առաջարկ էր արել շաբաթ, Վլադիմիր Զելենսկին այս օրերին քանիցս ասել է՝ անձամբ կգնա Ստամբուլ և կսպասի Պուտինին:
Կրեմլի խոսնակ Դմիտրի Պեսկովն այսօր էլ հստակ բան չի ասել, միայն նշել է՝ ռուսական կողմը շարունակում է նախապատրաստվել Ստամբուլի հանդիպմանը. «Իրականում սա է այն ամենը, ինչ կարող ենք ասել։ Մենք դեռ չենք պատրաստվում որևէ մեկնաբանություն անել: Հենց նախագահը նպատակահարմար համարի, մենք կհայտարարենք դրա մասին»։
Ուկրաինայի նախագահի խորհրդական Միխայիլ Պոդոլյակը Reuters-ին ասել է, որ Զելենսկին կբանակցի միայն Պուտինի հետ, քանզի միայն նա է վերջնական որոշումներ կայացնում:
Ռուսաստանի փոխարտգործնախարարն իր հերթին հայտարարել է, որ Մոսկվան պատրաստ է լուրջ բանակցություններ վարել, սակայն կասկածում է, որ Կիևը ևս պատրաստ է: Սերգեյ Ռյաբկովը նաև ասել է, որ Ստամբուլում քննարկվելու են հակամարտության կայուն կարգավորման և գետնի վրա իրողությունները, այդ թվում՝ գրավված տարածքները Ռուսաստանին միացնելու հարցը:
«Դեռ վաղաժամ է կանխատեսումներ անել։ Հարցը պետք է ուղղել Կիևի ռեժիմի հովանավորներին և հենց Կիևին. պատրա՞ստ են նրանք բանակցություններ վարել», - ասել է նա:
Ստամբուլում սպասվող ուղիղ բանակցությունները կարող են լավ արդյունք տալ. ԱՄՆ նախագահ
Մինչ այդ Միացյալ Նահանգների նախագահն էր հայտարարել, որ Ստամբուլում սպասվող ուղիղ բանակցությունները կարող են լավ արդյունք տալ: Դոնալդ Թրամփը, որն այսօր սկսել է իր շրջայցը Ծոցի երկրներ, նաև չի բացառել իր մասնակցությունն այս հանդիպմանը: Սպիտակ տան ղեկավարի կարծիքով՝ Ստամբուլ կգնան և՛ Ուկրաինայի, և՛ Ռուսաստանի առաջնորդները:
«Կարծում եմ՝ Թուրքիայում Ռուսաստանի և Ուկրաինայի հանդիպումը կարող է լավ արդյունք ունենալ: Կարծում եմ՝ երկու առաջնորդներն էլ այնտեղ կլինեն։ Այնքան շատ հանդիպումներ ունեմ, սակայն մտածում եմ այնտեղ թռչելու մասին։ Չգիտեմ՝ հինգշաբթի որտեղ կլինեմ», - ասել է Թրամփը:
Զելենսկին ողջունել է Ստամբուլ մեկնելու Թրամփի գաղափարը: Երեկոյան ուղերձում էլ ափսոսանք է հայտնել, որ Մոսկվան դեռ հստակ չի պատասխանել հրադադարի և ուղիղ բանակցելու առաջարկներին և շարունակում է կրակը. «Ռուսական հրետակոծություններն ու հարձակումները շարունակվում են։ Մոսկվան ամբողջ օրը լուռ է եղել ուղիղ հանդիպման առաջարկի մասին։ Շատ տարօրինակ լռություն»։
Այսօր էլ Զելենսկին ասել է, որ ինքը և Թուրքիայի նախագահը մայիսի 15-ին Պուտինին կսպասեն Անկարայում, իսկ եթե Ռուսաստանի նախագահը պատրաստ չէ գալ Անկարա, ապա իրենք կմեկնեն Ստամբուլ։ «Մենք ամեն ինչ կանենք, որպեսզի այս հանդիպումը տեղի ունենա»,- ասել է նա՝ հավելելով, որ բանակցելու են 30-օրյա հրադադարի շուրջ:
Քիթ Քելլոգն ու Սթիվ Ուիթքոֆը կմեկնեն Թուրքիա
CNN-ը, հղում անելով իր աղբյուրներին, տեղեկացնում է, որ անկախ նրանից ԱՄՆ նախագահն ինչ կորոշի Ստամբուլ գնալու հարցում, նրա հատուկ բանագնացներ Քիթ Քելլոգն ու Սթիվ Ուիթքոֆը կմեկնեն Թուրքիա: Ընդ որում՝ բանագնացները ուղիղ չեն մասնակցի բանակցություններին, այլ միայն կհետևեն դրանց: Քելլոգն իր հերթին Fox News-ին ասել է, որ Թրամփը Ստամբուլ կմեկնի մի դեպքում՝ եթե Պուտինը ևս գնա:
Ուիթքոֆը Breitbart News-ին տված հարցազրույցում ասել է, որ Թրամփը Ռուսաստանի և Ուկրաինայի նախագահներին վերջնագիր է ներկայացրել, որպեսզի սկսեն ուղիղ բանակցել: Ըստ նրա՝ Ռուսաստանն իսկապես հետաքրքրված է խնդրի խաղաղ կարգավորմամբ. «Կարծում եմ՝ ռուսներն իսկապես ցանկանում են խաղաղ կարգավորում։ Երկու կողմերն էլ փորձում են հասկանալ, թե դա ինչ կնշանակի իրենց համար։ Մեր աշխատանքն է նրանց բերել նույն սենյակ և ցույց տալ, որ խաղաղ կարգավորման այլընտրանքները վատ են բոլորի համար»:
Մոսկվան ակնհայտորեն փորձում է ժամանակ շահել. Կալլաս
ԵՄ արտգործնախարար Կայա Կալլասը, սակայն, չի կարծում, որ Ռուսաստանը շահագրգռված է հրադադարով, այլապես կդադարեցներ կրակը: Եվրոպացի պաշտոնյայի խոսքով՝ Մոսկվան ակնհայտորեն փորձում է ժամանակ շահել. «Նրանք դեռ ռմբակոծում են Ուկրաինան։ Եթե հետաքրքրված լինեին խաղաղությամբ, կարող էին հենց հիմա դադարեցնել կրակը»։
Ու մինչ Ռուսաստանը չի համաձայնում 30-օրյա հրադադարին, ԵՄ-ն դիտարկում է Ռուսաստանի նկատմամբ նոր պատժամիջոցներ կիրառելու հարցը: Կալասի մամուլի խոսնակ Անիտա Հիփերն ասել է՝ դիտարկվում են Ռուսաստանին ճնշելու բոլոր տարբերակները:
Այս ընթացքում ռուսական զինուժը շարունակել է անօդաչուներով հարվածել Ուկրաինային, Դոնեցկում կա մեկ զոհ և երկու վիրավոր, ևս երկու վիրավոր՝ Խարկովում: Հարձակման են ենթարկվել նաև Խերսոնը և Զապորոժիեն: Ռուսական կողմը հայտարարել է, որ Դոնեցկում ևս մեկ բնակավայր է վերցրել: Ուկրաինական DeepState նախագծի տվյալներով՝ ռուսներն առաջ են շարժվում Տորեցկ և Պոկրովսկ բնակավայրերի ուղղությամբ: Լուգանսկի՝ ռուսական հսկողության տակ գտնվող հատվածում երկու մարդ է զոհվել ուկրաինական անօդաչուի հարվածից:
