ՔՊ-ն Գյումրիի քաղաքապետին մեղադրում է մրցույթներում կողմնակալության մեջ. Սամսոնյանը չի ընդունում

Գյումրիում ընդդիմություն դարձած «Քաղաքացիական պայմանագիրը» քաղաքապետին մեղադրում է իր առաջնորդած «Բալասանյան» դաշինքի հետ փոխկապակցված ընկերություններին մրցույթներում առավելություն տալու համար։

Ավագանու այսօրվա նիստում խմբակցության ղեկավարը բերեց վերջերս մեծ աղմուկ հանած շների ստերջացման «Կումնի» ՍՊԸ-ի օրինակը։ Քնարիկ Հարությունյանն ասաց՝ ըստ իրենց ձեռքի տակ եղած փաստերի՝ ընկերության հիմնադիր Հարություն Վիրաբյանը կապ ունի Բալասանյանների հետ։

«Շահում են մարդիկ, որոնք ուղղակիորեն փոխկապակցված են ձեզ հետ, ձեր կուսակցության հետ, և իրենք ընդամենը փող են լվանում։ Լավ է, որ քրեական գործ կա», - ասաց նա։

Գյումրիի համայնքապետը չհերքեց փոխկապակցվածության հանգամանքը, միայն արձագանքեց, թե քրեական վարույթ է հարուցված։

«Քանի որ իրավական գործընթաց է գնում, թող մեղավորը պատժվի, կարողանա ամբողջ օրենքի խստությամբ իր պատասխանը տա, խնդիր չեմ տեսնում», - նշեց Վարդգես Սամսոնյանը։

Հարցին՝ ընդունո՞ւմ է իր նախկին կոալիցիոն դաշնակիցների մեղադրանքները, պատասխանեց. - «Չեմ ընդունում։ Եթե փոխկապակցված եղել էր, համապատասխան կառույցներ կան, թող գան, հարցնեն, կարգավորեն, օրենքի դեմ բոլորս պիտի պատասխան տանք»։

ԿԱՐԴԱՑԵՔ ՆԱԵՎ Ըստ փորձագետների՝ Գյումրիում զարգացումները վկայում են՝ ընտրական գործընթացները չեն ավարտվել ԿԱՐԴԱՑԵՔ ՆԱԵՎ Գյումրիում նախկին գործընկերներ «Քաղաքացիական պայմանագրի» ու «Բալասանյան դաշինքի» միջև լարվածությունը խորանում է

Անցած տարեվերջին ՔՊ-ն խզեց կոալիցիոն հուշագիրը «Բալասանյան» դաշինքի հետ ու դրանից հետո կոշտ քննադատում է Գյումրիի գործող իշխանություններին։ Արդյոք հող են նախապատրաստո՞ւմ քաղաքապետին անվստահություն հայտնելու համար, Վարդգես Սամսոնյանը հորդորեց հարցը չքաղաքականացնել։

Մանրամասները՝ «Ազատության» ռեպորտաժում.

ՔՊ-ն Գյումրիի քաղաքապետին մեղադրում է մրցույթներում կողմնակալության մեջ. Սամսոնյանը չի ընդունում